عرض الإعلامي علي فايز، مقدم برنامج "طريق الخير" المذاع على فضائية "العاصمة"، مشكلة السيدة بهية، التي غيرت هيئتها إلى رجل، وقصت شعرها وارتدت ملابس رجالية، وسمت نفسها "بكار"، كي تتمكن من العمل للإنفاق على أسرتها، دون مضايقة من المجتمع.

وقالت "بهية" خلال لقاءها مع الإعلامي علي فايز، اليوم السبت، في برنامج "طريق الخير"، إنها "باعت كليتها بـ25 ألف جنيه لتسديد ديونها والإنفاق على أسرتها، بعدما اضطرتها ظروف الحياة أن تعمل لتسديد احتياجات أسرتها، بعد أن احترق الـ"توك توك" الذي يعمل عليه زوجها في حادث، لقت فيه ابنتها مصرعها، وأُصيب فيه زوجها.

وتابعت "بهية": "بشتغل ورا مبيض محارة، وورا بنا، وعلى (توك توك)، وبيسموني في الشغل (بكار)، وبشتغل في أي حاجة بتجيبلي فلوس بالحلال، علشان جوزي عامل حادثة مع بنتي ومش قادر يتحرك، وربنا بيقويني علشان اقدر اشتغل واصرف على بيتي وعيالي".

وأضافت: "أنا غيرت هيئتي علشان جيراني كانوا بيبصولي بصة وحشة أما برجع متأخر باليل من الشغل، أنا حاسة بكل حاجة وحشة ممكن حد يحسها في الدنيا"، متابعة: "التوك توك بتاعي اتسلم في القسم علشان رخصته خلصت وعاوزة 3 آلاف جنيه علشان أطلعه، وعليا 6 آلاف جنيه ديون لناس كنت باخد منهم طلبات وانابيب بالآجل".

وأكدت "بهية"، أنها فكرت في بيع فص كبدها لأجل تسديد ديونها، ولكن الدكتور رفض لتأخر حالتها الصحية.

وطالب "فايز"، المسؤولين وفاعلي الخير بالاهتمام بحالة "بهية" ومساعدتها كي تتمكن من الحياة بشكل آدمي وكريم.

https://youtu.be/xOC_iBiDlts