أكدت والدة الشهيد أحمد زكريا، الذي راح ضمن مجزرة بورسعيد، أن مجلس إدارة الأهلي، برئاسة محمود الخطيب لم يحدد ميعاد أو قاعة لاحياء ذكري مذبحة بورسعيد، مشيرة إلي سفر الخطيب للسعودية للهروب من مواجهة الأهالي.

ويسافر الخطيب مع بعثة الفريق الأول لكرة القدم، لمواجهة فريق نجوم السعودية وديا المقرر لها غدا الجمعة.

وقالت في تصريحات خاصة لـ"بوابة المواطن":"مفيش قاعة لإقامة الذكرى والكلام معناه اننا من حقنا ندخل عند النصب التذكاري نقرا الفاتحة ونقف شوية لكن لا النادى عامل ذكرى ولا وجه دعوة للأسر واحتمال يكون الخطيب مش موجود لان عنده سفر ودى حجة جميلة جدا".

وأضافت:"ويوم ما الحكومة تقوله احنا رفضنا تعمل ذكرى وأنت عملتها يقولهم لا والله انا نفذت التعليمات لكن الأسر حضرت من نفسها تقرأ الفتحة لأولادها لكن أنا موجهتش دعوة لحد ولا حتى قابلتهم احنا وقفناهم عند النصب جنب الباب وبس ".

واستطرد:" نفس طريقة طاهر بس اشيك شوية الكلام ده لا يليق بينا ولا بمكانة اولادنا الله يرحمهم ولا ده اللى يستهلوه هما ماتوا علشان ام النادى ده اللى مش هيعمل حاجة تليق بيهم لأسف دى إهانة لابني انا مقبلش بيها ومش محتاجة أقف عند ام النصب بتاعهم ".

وقالت والدة إحد الشهداء:"انا وأسرتي مش هنحضر حفاظا على كرامة واسم ابني الله يرحمه ومحدش يقولى لازم نروح علشان النادى ميمنعش الذكرى بعد كدة هى فين الذكرى دى مجرد مكالمات مع اصغر أعضاء مجلس الادارة لكن لا الخطيب كلم حد ولا قعد مع حد".

وتابعت:" مفيش دعوات اتوجهت للاسر ولا قاعة وبنسبة أكيدة عدم وجود الخطيب ومقابلة الأسر، لانه مش رايح مخصوص لمقابلتنا ده بيقول ياريت كُنتُم خليتوا الميعاد الصبح علشان الخطيب يكون موجود وتشوفوه يعنى احنا اللى محددين الميعاد وهو مش هيجي مخصوص، قيمة اولادنا اعلى وأغلى من كدة".