سوسن بدر عن مشوارها كعارضة أزياء:"رجاء الجداوي كانت نموذج الست الحلوة "
الجمعة 09/ديسمبر/2022 - 04:37 م
الفنانة سوسن بدر
يارا حسن خضر
طباعة
عبرت الفنانة سوسن بدرعن امتنانها للفنانة القديرة الراحلة رجاء الجداوي، قائلة: "أنا اتعلمت منها حاجات كتير جدًا، وأنا مديونالها لحد النهاردة بجزء كبير جدا جدا من تكويني الشخصي كسوسن بدر بعيدًا عن الأزياء".
كشفت الفنانة، أمس الخميس خلال لقائها ببرنامج "معكم" مع الإعلامية منى الشاذلي على شاشة قناة CBC،لأول مرة تفاصيل بداية مشوارها الفني كعارضة أزياء والذي جمعها بالفنانة رجاء الجداوي رحمة الله عليها.
سوسن بدر عن رجاء الجداوي: كانت أشهر وأهم وأكبر وأجمل عارضة
وبسؤالها عن دخولها مجال عروض الأزياء، قالت: " مصر كان فيها بيوت أزياء مهمة جدًا جدًا في الوقت ده شبه بيوت الأزياء في أوروبا وباريس وإيطاليا حاجة عظيمة جدًا يعني، كنت في تانية ثانوي وقتها خدت تانية وتالتة في العرو ض، شوفت إعلان عن عرض أزياء لأتيليه أسمه " ڤينوس" كان في شارع قصر النيل جمب سينما راديو، كان طالب فتيات هيتم اختيارهم كعارضات بعد النجاح في الاختبار.
استكملت: " قررت اتجنن واروح، الحقيقة أبويا معارضش أوي ولا أمي، اليوم اللي روحنا فيه لجنة التحكيم كان موجود أ.فتحي خليل صاحب الأتيليه، وزجته مدام سوزان، وكانت أهم حد بقي اللي كنا منبهرين بوجوده هي رجاء الجداوي الله يرحمها حبيبة قلبي، علاقتي بيها بدأت من اليوم ده شوفي من زمان أوي، كانت أشهر وأهم وأجمل عارضة في الوقت ده".
أضافت: "رجاء كانت نموذج إزاي الست الحلوة تقعد وتتكلم وتتحرك، ماسكة الجوانتي بحركة الرجل وغيرها ملهاش زي الله يرحمها، اختبرتنا ونجحنا، بس أنا وزميلة اسمها رانده كنا أهم اتنين، لأننا كنا رفيعين فعجبناها وقررت إنها تكون هي المسؤولة عن تدريبنا".
أوضحت: "ماكانتش بس بتدربنا إزاي نمشي ونعرض وإزاي نلبس فستان، لا علمتنا إزاي نقعد وإزاي نحط ايدينا، ومنضحكش بصوت عالي. وإن العارضة دي ست والست لازم يبقالها شكل وطريقة معينة، شوفي أنا اتعلمت منها حاجات، أنا مديونالها لحد النهاردة بجزء كبير جدًا جدًا في تكويني الشخصي كسوسن بدر.
