طارق حامد: «مرتضى منصور اتهمني بالتمرد والخيانة وطردني من النادي»
الثلاثاء 31/يناير/2023 - 12:21 ص
طارق حامد عن يتحدث رئيس نادي الزمالك
محمود حربي - يارا صلاح
طباعة
قال طارق حامد، لاعب منتخب مصر، ونادي اتحاد جدة السعودي، إن مرتضى منصور رئيس نادي الزمالك، أقام مؤتمرا ً صحفياً اتهامه فيه بالخيانة والتمرد على النادي دون وجه حق.
وأضاف طارق حامد، في فيديو بثه عبر حسابه الشخصي على «فيسبوك»: « أنا قعدت مع لجنة الكابتن حسين لبيب رئيس نادي الزمالك في الوقت دا، والناس تعاملوا معايا بكل احترام ومختلفوش معايا خالص، وكان تجديدى مجرد وقت، واتفاقى معاهم إنى أكون آخر لاعب يجدد».
أسباب عدم تجديد طارق حامد لنادي الزمالك
وتابع لاعب اتحاد جدة: «واللجنة مشيت وبعده جي المجلس القديم في نوفمبر، من نوفمبر ومارس محدش من مجلس الإدارة أتكلم معايا في موضوع التجديد أو قعد معايا، ويوم 3 مارس رئيس النادي كلمنى وروحت أنا ووكيلي، أول ما تقال إنى أروح اقعد روحت وقعدت، والرقم اللى اتقال في الميديا متعرضش عليا، واصلا الأمور المادية لازم تكون سرية، كل اللى طلبته مهلة للتفكير وده حقى الطبيعي».
واستكمل: «بعدها بكام يوم دخلنا معسكر الوداد في مصر، كنا مركزين على الماتش، وقبل ما الماتش يخلص فوجئت إن النادي بيقول في الإعلام إنه مش هيجدد العقد بتاعي، وقبل ما أخرج من باب الاستاد قالولى الزمالك قرر إنه مش هيجدد لك فهمت إنه مكنش فيه نية للتجديد».
طرد طارق حامد من الزمالك
واستطرد: «قبل مفوق من تهمة المماطلة والمساومة لقيت مؤتمر صحفي معمول بيتقال فيه إنى متمرد وخاين وإني السبب في خروج الزمالك من أفريقيا وكنت سليم ومردتينش أروح معاهم».
ولفت طارق حامد: « فوجئت إن النادي بعت الاستغناء بتاعي لبيراميدز وأنا اللى رفضت أسيب الزمالك، وكان معروض ليا رقم خيالي، وأنا كنت صاحب القرار علشان كان باقي سنة في عقدى».
وأوضح: «علشان أثبت حسن نيتي عرضت عليهم إني أتنازل عن باقي مستحقاتي فاشترطوا عليا إني أمضى على ورقة بتقول إنها غرامات وهي مستحقاتي».
واختتم: «وأنا مش متخيل إن جمهور الزمالك ممكن يشكك في حبي وانتمائي لا أنا لا يمكن أسيب صورتي قدامكم كدة لازم كنت أقول الحقيقة علشان أنتم كنتوا سند ليا».
