هاجم الإعلامي باسم يوسف جماعة الإخوان المسلمين، بمنشور صارخ على صفحته الرسمية بموقع التواصل الاجتماعي "فيس بوك"، استنكر فيه معظم أفعال "الإرهابية" الآن، ومنذ وقت تولي المعزول محمد مرسي الحكم، حتى قيام ثورة 30 يونيو المجيدة.


فدون الإعلامي في منشوره: "و الله والله والله انا بحاول اتجنب اجيب سيرتهم. بيفضلوا يستفزوا في الناس ويزايدوا على اللي جابونا وبنحاول نسكت عشان لما بنرد واحد لطيف يطلع يقول:" هو ده وقته؟" "يا عم الضرب في الميت حرام" "المفروض نصطف وما نعضش في بعض" الخ الخ. المشكلة ان حتى الواحد وهو بيتكلم عن النظام الحالي او بلاويه وبيتجاهلهم خالص ومش بيجيب سيرتهم، بيطلعوله برضه عشان يلوموا الواحد على اللي بيحصل ويقولك انتم السبب وانتم المسئولين الخ الخ. فعلشان كده يظهر ان الواحد لازم يفوقهم كل شوية ويفكرهم بتاريخهم الوسخ مش عشان يعرفوا غلطتهم، لا،البوست ده مش ليهم، لانهم مكابرين ومدعين ومنكرين للمصايب اللي عملوها. لا ده للناس اللي بيتأثروا بكلامهم وبمظلوميتهم وبيصدقوا ان اللي حصل ده غلطة ناس تانية غيرهم وعشان يشوفوا وساختهم ويحطوها قدامهم، لو انت يا عزيزي منهم ولكنك محترم نفسك وكافي خيرك شرك وعارف ان الكل اخطأ يبقى تعال على جنب شوية، باعتذرلك لو البوست ده طرطش عليك، مش انت المقصود نبتدي بالسطر المفضل:"انت كنت السبب في القضاء على التجربة الديموقراطية بسخريتك من مرسي".

وتابع يوسف كلامه عن فهم الأخوان للديمقراطية قائلًا: "لا يا حبيبي، انت فاهم الديموقراطية غلط. الديموقراطية مش منة ولا فضل من مرسي بتاعكم. الديموقراطية هي اللي ليها الفضل انه جه رئيس. والديموقراطية دي هي اللي خلتكم تعيطوا بعد الجولة الاولى لما مرسي اللي كنتم فاكرينه حيكتسح اضطر يخش جولة تانية قدام شفيق. وفضلتم تلفوا على "رفقاء الميدان" واحد واحد وتعيطولهم وتكلموهم وتترجوهم و"النبي تعالوا مؤتمر الفيرمونت" بعد لما كنتم بتفشخوهم وبتهاجموهم في برامجكم وتشنعوا عليهم. وبسببهم مرسي كسب بواحد في المية بسبب "عاصري اللمون" اللي زقوه. انا كنت من الناس اللي انتم اتصلتم بيهم واترجتوني اساند مرسي وانا قلت الاتنين اوسخ من بعد مش حعلن تأييدي لحد".

وأردف: "بسبب الديموقراطية يا حبيبي مرسي المفروض كان يتبهدل وينتقد بادب وبقلة ادب. الديموقراطية مش بتخلص عند الصناديق. الديموقراطية بتكمل لبعد كده. اه والديموقراطية فيها شتيمة وسخرية وتأليس عادي. كان المفروض نعمل ايه يعني؟ نسكت؟ نطبل؟ نسكت وشيوخ السلفية الامنجية بيتكلموا عن كرامات مرسي في صلاة الفجر وازاي "نصارى مصر حيدخلوا دين اللله افواجا بعد ازالة قبضة الكنيسة الحديدية" نسكت على هبل مرسي والناس اللي مختارهم وتناقضاتهم؟ نسكت على الزبالة اللي كنا بنشوفها في قنواتكم؟ وكمان هو احنا كنا بننتكلم لوحدنا؟ انتم كان عندكم بدل القناة مواقع وصفحات وجريدة وقنوات سلفية في صفكم (الناس، الحافظ، الخليجية وغيرهم). كنتم بتطلعوا في القنوات دي وتنتهكوا حرمات الناس: تتهموا ده بالشذوذ، ده بالكفر وده بالعمالة. وكل ده على فكرة في ظل الديموقراطية اللي كنا كلنا عايشين فيها مش بمنة ولا فضل من مرسي بتاعكم".
وتابع: "اللي حصل بعد كده ان انتم اللي انتهكتوا الديموقراطية دي. لما مرسي قعد مع رؤساء الاحزاب واتصور معاهم وبعدين طلع اعلان دستوري لوحده وبعت ميليشياته للمحكمة الدستورية العليا وحاصرها ووقفت الميليشيات هناك تهتف للداخلية اللي وقفت وما عملتش حاجة.. فاكرين؟ فاكرين ولا نفكركم؟".

ورد "يوسف" عن كلام الإخوان عن عدم مشاهدة البرنامج وقت حكم مرسي قائلًا: "موضوع بقى ان البرنامج ما حدش قربله وقت مرسي: يا راجل؟ طب هو انا رحت النائب العام اتفسح؟ ست ساعات استجواب وكفالة وعلي قنديل(اللي استضفته في الحلقة) نفس الموضوع. طب ايه رآيكم بقى ان قبل تلاتين ستة وزير الاستثمار الاخواني بتاعكم بعت تحذير مكتوب لكل القنوات ان اي برنامج حيسخر من الرئيس حيتقفل والقناة حتتقفل بعد الانذار التاني؟ الانذار ده اتبعت واحنا بنصور اخر حلقة قبل تلاتين ستة. يعني نيتكم كانت وسخة اصلا".