بعد رفع سعر تذكرة المترو.. مواطنين: هنتعتصم وهنرفض الزيادة
الخميس 23/مارس/2017 - 06:09 م
رحاب جمعة
طباعة
في خبر صادم للجميع، قرر الدكتور هشام عرفات، وزير النقل، بعد موافقة رئيس مجلس الوزراء، على زيادة سعر تذكرة المترو إلى جنيهين، للتذكرة الكاملة، وجنيه ونصف للأنصاف، وجنيه لذوى الاحتياجات الخاصة، وذلك بداية من صباح غد، الجمعة.
وكان وزير النقل، قد أكد أمام لجنة النقل والمواصلات بمجلس النواب عزم الحكومة على تحريك سعر تذكرة المترو بسبب الخسائر والديون المتراكمة على المرفق نتيجة الفارق بين قيمة التذكرة وتكلفتها الفعلية، محذرًا من توقف المرفق فى حالة استمرار الوضع الحالى.
بعد ساعات على زيادة سعر التذكرة، "المواطن" تجوّل داخل مترو الأنفاق، وتواصل مع عدد من المواطنين، لرصد أرائهم حول الزيادة.
الحكومة بتيجي على الفقراء
رفضت سهير محمد، طالبة في جامعة القاهرة، ومقيمة في شبرا الخيمة، زيادة سعر تذكرة المترو، فقالت: "يا ريت الحكومة الفاشلة تبطل تيجي على الفقراء، ويسيبوا لينا وسيلة المواصلات الوحيدة اللي لسه مترفعش سعرها، حرام بجد كل حاجة الأسعار زيادة بالمنظر ده بجد حرام".
إدرة الحكومة فاشلة
وقال محمد سامي، ممثل خدمة عملاء لأحد شركات الانترنت، أن زيادة سعر تذكرة المترو خبر صادم للكثيرين، وسيسبب أزمة للكثيرين في ظل ارتفاعات الأسعار التي تضرب الدولة، فقال: "تذكرة المترو زادت وبكده يدوب هيكون مرتبي مواصلات وأكل، وده شئ ميرضيش ربنا، الحكومة فشلت في إدارة المترو وبتتشطر على الغلابة اللي مش لاقيين ياكله، ممكن يفرضوا ضرائب على الأغنياء تعوض سوء إدارتهم، مش كل مشكلة في البلد يحملونا أحنا الذنب".
هنعتصم في المترو
وعبرت سميحة محمد، ربة منزل، عن استيائها، فقالت: "انا يوميًا بركب المترو 4 مرات، يعني بما أن التذكرة هتزيد جنيه، هدفعلهم يوميًا 8 جنيه، في الشهر 180 جنيه، يعني مواصلة واحدة بس هدفعلها المبلغ ده، هو المرتب فيه كام 180 جنيه، كده إحنا هنسرق من بعض علشان نكفي بس الاحتياجات اليومية، وبجد ياريت كل الناس تعتصم في المترو، ونرفض الزيادة دي ومنقبلش بقراراتهم الغريبة".
مطالب برفع التذكرة على الباعة الجائلين
وفي سياق مختلف، طالب ناجي محمد، الحكومة برفع الأسعار عن الباعة الجائلين في مترو الأنفاق وليس للمواطنين العايين، فقال: "بدل زيادة سعر تذكرة المترو على المواطنين الغلابة اللي كتير منهم مش لاقي ياكل، يزودوها على الباعة الجائلين اللي بيدخلوا المترو بدون دفع أي تذكرة تحت رعاية رجال الأمن".
هنترحم من المتحرشين
ومن ناحية أخرى، وافقت نهى السيد، على رفع سعر التذكرة، قائلة: "والله كويس يمكن لما غليت كده نترحم من المتحرشين، اللي بيدفعوا جنيه ويدخلوا يتزنقوا في الستات".
