أبكت الفنانة مي كساب الملايين بعد مشاركتها لجمهورها برسالة مؤثرة عن تأكيدها من براءة زوجها وصديقه مطربا المهرجانات الشعبية "أوكا وأورتيجا"، وذلك عبر حسابها الرسمي على موقع الفيديوهات والصور "إنستجرام".

وعلقت "مي" قائلة: "كل اللي يعرفني من قريب يعرف كويس أني عمري ما كرهت حد ولا عمري أذيت حد ولا عمري عملت تصرف مخل بالشرف ولا اتنازلت عن شرفي ولا كرامتي في يوم من الأيام واستحملت ظلم كتير واضطهاد ومحسوبيات وكنت طول الوقت بصبر نفسي بكلام أبويا الجميل اللي رباني على القناعة".

وأضافت: "كان دايمًا يقولي انتي عاملة زي عسكري في الجيش كل شوية بيترقى بجهده وتعبه ويتنقل من سلاح لسلاح، أنا مريت بظروف صعبه كتير في حياتي بس للأسف بقالي ٤ سنين مش بشوف يومين حلوين على بعض أنا بعيش أقسى أيام حياتي من يوم ما اكتشفت أن أمي عندها السرطان، وأنا مش مي أنا واحدة تايهة مش لاقية نفسها موت أمي كسرني ومن بعدها أحداث كتير قوي وجعتني".

واستكملت: "القريبين مني عارفين أنا استحملت حاجات صعبة كتير أد إيه السنين اللي فاتت بس الصراحة ده أصعب موقف اتحطيت فيه من يوم ما اتولدت مش عشان ده جوزي وحب عمري وإحساسي بعدم وجوده جمبي كأن روحي متاخده من جسمي لا عشان متأكدة إنه مظلوم، متأكدة أنه ضحية طيبته وسذاجته، وللأسف ضحية تعليمه المتواضع الضحل، ضحية ثقته الزيادة عن اللزوم في أي شخص يقرب منه ويضحك عليه ويقوله أنا هاعملك ويوعده وعود كدابة وفي الأخر يستغله ويورطه".

واختتمت كلامها: "طبعا لما بتكلم عن محمد كأني بتكلم عن أحمد كمان أوكا وأورتيجا روح واحدة في جسدين ثقتي في رب العالمين كبيرة جدا أنه هينصرهم ويفك كربهم ثقتي في عدالة القضاء العسكري كبيرة أنه مش هيظلمهم ثقتي في قلوبكم الرحيمة كبيرة إنكم هتقفوا جمبهم ادعولهم وادعموهم اقسم بالله العلي العظيم #اوكا_واورتيجا_مظلومين".