بالفيديو والصور.. "قماح" فى ندوة "المواطن": العالم سيشاهد أنجح بطولة سنوكر فى سهل حشيش رغم التحديات الصعبة

الثلاثاء 25/يوليو/2017 - 09:47 ص

طباعة

أدار الندوة: محمود الشيخ .

أعدها للنشر : إسلام عبدالتواب .

شارك فيها : جمال عقل - مصطفى محمد - محمد بندارى -عبدالحميد ياسر.

حرص موقع "المواطن" علي التواصل مع محمد قماح رئيس الاتحاد المصرى ،والإفريقي وسكرتير الاتحاد الدولى للعبة البلياردو "سنوكر"، واستضافته في ندوة خاصة، لمعرفة أخر استعداداته لبطولة العالم بسهل حشيش والتي تقام مطلع الشهر المقبل ، وإلقاء الضوء علي البطولة التي تقام في مصر ،والكشف عن العديد من التفاصيل وأبرز ما جاء في الحوار..

الاستثمار فى البلياردو مربح للغاية..وبطولات العالم تأثرت بثورة يناير.

أبطال العالم والأجانب يدافعون عن مصر ويروجون للسياحة أكثر من المصريين.

الأهتمام بلعبة البلياردو تغيير للأفضل فى الماضى كانوا بيعاملونا كتجار المخدرات.

نسعى لتطوير اللعبة وانتشارها وزيادة عدد المحترفين بها.

نعانى من ضعف الإمكانيات ولايمكن أن أنسى هذا الموقف لأحمد مرتضى منصور.

أتمنى حضور الرئيس ووزير الشباب والرياضة فى افتتاح البطولة.

تنازلت عن رئاسة الاتحاد المصرى للنائب حتى لاتخسر مصر رئستها للاتحاد العربى.

وفيما يلى نص الحوار..

في البداية .. حدثنا عن لعبة البلياردو في مصر؟

البلياردو لعبة شعبية ومنتشرة في جميع أنحاد الجمهورية ،وفي وقت من الأوقات كانت منتشرة في جميع شوارع مصر بجانب تنس الطاولة ولكنها حوربت إعلاميا بلا أي داعي وكانت شرطة المرافق تفخر بإغلاق أندية البلياردو دون التفكير في عمل تراخيص بالتعاون مع وزارتي الشباب والرياضة والسياحة وذلك كان سيعود بالنفع علي الدولة من خلال تحصيل الضرائب وأرباح , بجانب ظهور مواهب تستطيع تمثيل مصر، ومن المفترض أن يتم معالجة تلك الأزمة في قانون الرياضة الجديد.

ونأمل أن يهتم الإعلام بالألعاب الأخري غير كرة القدم ، خاصة وأن كل القنوات تتحدث عن كرة القدم ولا أحد يعرف أن مصر لديها بطل حقق مركز ثامن العالم في البلياردو وثالث عالم في بطولة شرم الشيخ .

و اللعبة الفردية الوحيدة التي إنتشرت في الفترة الأخير كانت الإسكواش "عشان محمد حسني مبارك كان بيلعبها".

هل الاستثمار في البلياردو مربح؟
طبعا .."وهي من أفضل الألعاب التي تستطيع أن تستثمر فيها وتجني الأموال التي قمت بصرفها خلال سنتين وأنا كنت أملك مطعم ونادي بلياردو وكنت بكسب منه كويس ولازم نفكر بعقلنية لحل المشكلة ونبتعد عن المصالح الخاصة وجملة بعمل عشان مصر والكلام دا" .

اللعبة منتشرة في الكافيهات والشوارع لكن لا توجد ثقافة وجود بطولات أو اتحاد بلياردو .. ما السبب ؟
الناس بدأت تعرف دلوقتي من خلال الصحافة لأن زمان اللي كان عنده طرابيزة بلياردو كان يعامل معاملة تاجر المخدرات ودلوقتي بطولة العالم اللي هتبدأ في سهل حشيش قناة دي ام سي بتعلن عنها منذ أسبوع وبدأ الإعلام دلوقتي بيشجع ويساند الناس علي لعب البلياردو بعد ما كان بيهاجمها.

هل تأثرت البطولات بالثورة؟
طبعا بطل العالم خاف يجي مصر بسبب الثورة ولما لقي الدنيا أمان قال لا الناس دي غلطانة إنها مجتش مصر لأنها بلد الأمن والأمان ولازم نشوف الناس برا بتقول ايه ونرد عليهم لأن الناس اللي مجتش مصر خايفة تيجي برده بس اللي جه أطمن خلاص .

كيف واجهتم اتهامات البعض بأنه لا يوجد أمان بمصر؟
عن طريق الرد عليهم من خلال مواقع التواصل الإجتماعي "فيس بوك وتويتر" كي نكسر الحاجز السياحي علي مصر .

إيه الفرق بين البلياردو والكاروم و والسنوكر؟
التلاته بمضرب بس ,مضرب مختلف وقانون مختلف وملعب مختلف وكل واحدة ليها اتحاد دولي مختلف .

حدثنا عن بطولة العالم بالغردقة؟
العدد المشاركة في البطولة 27 دولة وهو عدد قليل جدا ففي 2015 شارك 50 دولة ، ونعاني الآن من أزمة مقتل الأجانب في مصر .

هل ال27 دولة قابلين للزيادة للمشاركة في البطولة؟
منتظرين الرد بعد إرسال خطابات للدول.

هل قلة العدد المشارك في البطولة هيأثر علي الاستعدادات؟
لا خالص الاستعدادات واحدة ونعمل علي قدم وساق من أجل خروج البطولة بشكل جيد.

هل الأجانب خائفين من المجئ لمصر رغم زيارة ميسي ورونالدو؟
طبعا لسه خايفين بردة لأنهم عارفين إن الناس دي جت عشان تاخد فلوس بس وميسي ورونالدو هيفيدوا مصر لما يكتبوا علي الفيس بوك وتويتر أن مصر بلد أمنه .

كيف نواجه تلك الأزمة؟
عن طريق استضافة نجوم كبار وفنانين وعمل حفلات في الأهرامات وليس عن طريق استضافة نجوم كوره سابقين ولازم نجيب فرق غناء من روسيا وممكن نعمل حفلة لنجوم مشهورين بأوروبا في الأهرامات .

من يتحمل تكاليف استضافة المشاركين في البطولة ؟
الاتحادات المحلية والإقامة ليست مجانية.

عدد البطولات التي أقيمت في مصر؟
السنوكر والسيكس باد للمرة الثالثه بعد 2002 و2015.

هل تواجد بطولات أخري سيتم تنظيمها؟
في شهر 12 في بطولة للبيلياردو الفرنسية وهشارك فيها 22 دولة وهتقام في الأقصر والغردقة .

ألي أين وصلت الاستعدادات لبطولة الغردقة ؟
طبعا اللي مفرحنا ان قناة "دي ام سي" هتذيع البطولة وبعتنا me>للصين عشان يذيعوا البطولة هناك خصوصا إن هناك 800 مليون بيشاهدوا السنوكر وليهم أبطال فيها .

هل تعتمد اللعبة علي الموهبة أكثر أم التدريب؟

الاثنين لان الموهوب هيلعب كويس يعني مثلا في كرة القدم أنت حريف هتلعب ربع ساعة وهتتعب لكن التدريب هيخليك تلعب ال90 دقيقة بنفس المستوي .

هي يستطيع اللاعب الغير موهوب ممارسة اللعبه ؟
ممكن طبعا ويكون بطل بس يتطلب منه زيادة عدد ساعات التدريب عن اللاعب الموهوب لان الموهب بيدرب كويس وفاهم.

هل مسموح للاحتراف في البلياردو؟
اه طبعا وشركات كمان يعني الاتحاد الأفريقي تعاقد مع شركة صينية و3 من حاملي لقب كأس العالم متعاقدين معاها وهي الشركة المصنعه للطاولات ومعاه 3 أبطال بس لازم يكون في أخلاق عشان تعرف تجيب فلوس زي "محمود الخطيب "لأنه محترم وعمره ما غلط وفي مرة رجع 400 ألف جنية لما كان بيدرب المنتخب مع فاروق جعفر ، بعد ما فشل في التأهل وقال انا جاي عشان مصر.

هل زادات جوائز البطولة عقب الثورة؟
للاسف المفروض إننا نزود الجوائز عشان الناس تيجي بس الدعم السنادي أقل لاننا بنعتمد علي الدعم والجوايز كانت السنة اللي فاتت 52 ألف دولار قبل خصم الضرائب والسنادي 20 الف دولار وهنخصم منهم الضرائب .

في شركات ماضية مع الأهرام بس بتدفع دفعة والباقي بعد انتهاء البطولة بشهرين ودي مشكلة وعقد الاتحاد مع الأهرام بينص علي الحصول علي الفلوس بعد البطولة بشهرين والناس بتكون سافرت خلاص.

البطولات بتعود بالنفع علي السياحة لماذا لا يوجد دعم من الدولة للاتحاد؟ بالرغم إن دا سبب لعودة السياحة؟
في مجلس إدارة وممكن واحد يطلع"فيتك" يقول قرار يلبسنا في الحيط وهيئة ترشيد السياحة عايزة تشوف احنا هنعمل ايه عشان تصرف ولو قولنا عكس كلامها هيتقال دا اهدار للمال العام وفيه مصالح .

خطة الاتحاد لتطوير اللعبة ؟
أولا نفسنا نستمر في البطولة التي ننظمها لان عندنا لاعبتنا بتتعلم ولما تحتك مع أبطال العالم هيستفيدوا وانا مستمر لحد 2019 وفي حالة عدم قدرتي علي التطوير سوف اعتذر وأقدم استقالتي ومش هقدر اكمل في حالة استمرار الدعم بالشكل د ا وبنفتح دلوقتي اكاديمية في استاد القاهرة واتفقنا مع استاد الاسكندرية لعمل اكاديمية هناك ، ونفسي نعمل اكاديمية في الصعيد ولازم نطور الصعيد ونتخطي اهماله.

واحنا من ضمن خطتنا تعريف الناس باللعبة وانها لعبة محترمة وطمئنة الأهالي علي ابنائهم وانه امامهم فرصة للاحتراف وممكن يصبح مليونير وعلي سبيل المثال بطولة العالم الماضية الفائز الأول حصل علي 300 ألف جنية إسترليني .
ومحمد صلاح لازم يتعامل معاملة بطل قومي وسمع اسمنا برا كويس.

سبب شكوي بعض اللاعبين من قلة الدعم والامكانيات؟
طبعا انا لما بأجي انظم بطولة باخد الفلوس من الوزارة ولو مفيش فلوس في وزارة الشباب مش هقدر اشتغل واحنا بناخد دعم 2000 الف في السنة ودا مش هيعمل حاجة.

لماذا لا يبحث الاتحاد عن موارد؟
دلوقتي بدأنا نتحسن وأول بطولة في 2014 دخل 3 شركات وأخدنا 48 ألف جنية وفي 2015 مأخدناش حاجة و2016 أخدنا 90 ألف والسنادي في 3 رعاه وهيجي مبلغ كويس للاتحاد وأول خطة إن وفرنا مدرجات للجماهير لحضور البطولات .

كيف نواجه أزمة قلة الدول المشاركة في البطولة؟ وكيف نواجه ذلك؟
عن طريق الإعلام.

لماذ لم تطلب زيادة الدعم من وزارة الشباب والرياضة لتنشيط السياحة؟
طيب وفين وزير السياحة انا بعتله علي البطولة وبعتله دعوة وقولتله ان هيئة تنشيط السياحة خفضت الدعم والمفروض دا حدث يفيد السياحة الرياضية .

رساله توجهه لرئيس الجمهورية ؟
مفيش رساله بس أنا أتمني أن كل واحد يقوم بشغله مظبوط بدون أنانيه وندي كل صاحب حق حقه .

رساله لوزارة الشباب ووزير الرياضة وهيئة تنشيط السياحة ؟
بتمنا يحضر لان حضوره دعم للحدث وياريت يعيدوا النظر في الدعم لان مفيش وقت وفاضل أقل من أسبوع علي البطولة.

هل المهندس خالد عبد العزيز هيحضر البطولة؟
انا بعتله رساله وهو ابدي اهتمام ونأمل انه يجي ومقدرش اقول غير كده.

طموحك وتطلعتك مع الاتحاد ؟
اتمني اننا نبقي ابطال عالم واحنا ابطال افريقيا دلوقتي وننافس الإمارات في بطولة العرب ، وحققنا مركز تالت في بطولة العالم

أهم الأندية التي تهتم بلعبه البلياردو في مصر؟
الشرقية للدخان والزهور والزمالك ومن المفاجأة أن أحمد مرتضي منصور عضو مجلس إدارة القلعة البيضاء كان موجود في توزيع جوائز بطولة الجمهورية ولما عرف أن الجوائز5 ألف جنية دعمنا فورا ب10 آلاف من جيبة الخاص ونادي الشمس برده مهتم باللعبة وعندهم 14 طربيزة وصالة خاصة.

هل انت راضي عن عملك في الاتحاد؟
مش أنا اللي احكم بس ياريت اللي ينتقد يقدم نقد بناء مش ينتقد وخلاص.

سبب تنازلك عن رئاسة الاتحاد المصري للنائب؟
لائحة الاتحاد العربية الجديدة تنص علي أن يكون المرشح لازم يكون رئيس في الاتحاد المحلي وإحنا يهمنا المنصب دا واستطعنا خطف المركز من ملياردير إمارتي وكانت صادمة لدول الخليج والمصلحة العامة كانت تقتصي ذلك,وبعدين انا سكرتير الاتحاد الدولي ورئيس الاتحاد الافريقي ولو قدرت اخلص من المناصب دي ياريت.