اعتذر المهندس موسى مصطفى موسى، المرشح بانتخابات رئاسة الجمهورية، اليوم السبت، عن تأخر قراره بالترشح، مؤكدًا: "عايز أقول إن ترشحى من أجل الشعب المصرى، ومش مجاملة لحد، وإن المرحلة اللى جاية مهمة ولازم نتنازل عن الشخصنة، مصر مستهدفة، وأعلم حجم الرئيس السيسي وقيمته، كما أعلم أن مصر تستاهل أداء كبيرا".

وعلق "موسى" على علاقته بالرئيس عبدالفتاح السيسي، في كلمته باجتماع حزب الغد مع مجلس القبائل العربية: "مفيش عداوة بيني وبين السيسي، نحن نسير فى نفس الاتجاه، إحنا أبناء 30 يونيو، وعايزين الناس تشارك في الانتخابات، انتوا شايفين الدور اللى بقوم بيه؟ أنا بتهاجم بسبب ترشحى من جهات مختلفة منها الإخوان، وبتهاجم من المجموعة بتوع المقاطعة اللى هدفهم إحراج مصر، ولازم نتغلب على المرحلة دى وننزل الانتخابات وندى أصواتنا، مصر محتاجة لنا كلنا".

وأضاف: "أفتخر بدورى وتاريخى فى السياسة، وأنا مش محتاج مساعدة مالية من حد، والمرحلة الجاية مرحلة إقناع الناس ببرنامجى الانتخابى والسياسى، مصر محتاجة إخلاص وإنكار ذات، ورغم كده بنتحترم ونقدر إنجازات السيسي، لكن الشعب هو اللي هيقرر، والمهم نتصدى لأعداء الوطن".

وعن دعوات المقاطعة للانتخابات، قال "موسى": "دورى معروف، وتاريخى السياسى معروف، والقبائل العربية أهلي، لكن كل اللى بيهاجمونى مش بيضربوا فىّ أنا، إنما بيضربوا فى الانتخابات، أنا ما دخلتش انتخابات شكلية ولا مجاملة لحدّ، يشرفنى أتكاتف مع الرئيس السيسي لبناء مصر، وسنكون دائما فى حالة دفاع عن الوطن".