روت الدكتورة وسام للإعلامي عمرو أديب خلال برنامج "الحكاية"، المذاع عبر قناة "ام بى سى مصر"، تفاصيل إيقافها لقطار للإسكندرية لإنقاذ رضيع من الموت.

طبيبة توقف قطار الإسكندرية 

وقال عمرو أديب: "قطر كان طالع من أسيوط لـ الاسكندرية القطر الاسباني وصل محطة رمسيس وفي المحطة جه الكمسرى هتف فى الناس يا جماعة مفيش دكتور؟.. فراحت طالعة واحدة قالتله انا دكتورة فى ايه؟.. قالها في عيل بيموت مننا والقطر مشي مش عارفين نعمل ايه؟.. قالتله فين العيل؟.. بصوا لقوا أم حاضنة طفل سنة ونص بيموت قالت له ده بيموت.. الست مقلتلوش مثلا ربنا معاه ادولوا اي بق مية.. قالتله فين سواق القطر وديني ليه.. واخدها وطلعوا على السواق قالت له أنا عايزاك توقف القطر حالًا فى طفل بيموت.. طبعا السواق دي مسئولية عليه عارفين يعني ايه حد يوقف قطر".

وأضافت الدكتورة فى مداخلة هاتفية بالبرنامج: " رئيس القطر اتصل باللاسلكي بالسواق وطلب منه يوقف القطر لأن فيه حالة إنسانية طفل محتاج اسعافات فسواق القطر رفض مش علشان دي مسئولية لازم يجيله اوردر من حد اكبر منه.. وحصلت مشادات وكلام كتير وتليفونات ورئيس القطر كان بيسالني يادكتورة نوقف القطر؟.. قلت له وقف مفيش حل تاني وكان لازم اسعاف".

وتابعت: "السواق كان عايز يقف في محطة طنطا وكان قدامنا ساعة على طنطا مكنش الولد هيستحمل اصراري وقفنا فى محطة بنها ولاقينا اسعاف وشرطة والمحطة كلها كانت في استقبال الطفل وأبوه ونزل ووصلت الإسعاف وراحوا مستشفى اطفال بنها واسعفوه هناك والولد رجعت حالته كويسة كان بيعاني من حرارة شديدة جدا وتشنجات وتوقف للوعي وهناك ادولوا محاليل وخافض وبقي كويس وبيكمل علاجه في البيت".