فيديو| ركاب الترام المكيف بالإسكندرية: تجربة ناجحة ومشرفة
الأحد 17/مارس/2019 - 05:30 م
مريم حسن
طباعة
فرحة عارمة ترتسم على وجوه أهالي الإسكندرية منذ قدوم الترام المكيف من أوكرانيا ليزين شوارع عروس البحر، وذلك فى إطار خطة هيئة النقل العام لدعم أسطولها بأحدث وسائل النقل.
الترام المكيف بالإسكندرية
الترام المكيف
تجولت «بوابة المواطن» الإخبارية داخل الترام المكيف بالإسكندرية، لرصد فرحة الركاب بالتشغيل التجريبي للترام كأول تجربة فريدة من نوعها فى الجمهورية، قبل افتتاحه بأيام قليلة.
قالت أميمة جابر، إنها استقلت الترام المكيف منذ بداية تشغيله ما يزيد عن 4 مرات، معربة عن سعادتها بخوض هذه التجربة «الترام مريح جدا ونظيف والكراسى آخر جمال، وكل ما اركبه باخد حد من صحابى معايا وادفعله التذكرة عشان يحبه زيى ويركبه دايما».
وأوضحت، أنه يتم تشغيل الموسيقى طوال رحلة الترام المكيف بالداخل والخارج، أي أن صوتها ينطلق إلى الشوارع، بالإضافة إلى تزويدها بشبكة الواي فاي، وإخطار صوتي ومرئي للراكب داخل العربة عن المحطة التالية، وتحذير صوتى للراكب عند غلق الأبواب، متابعة: «طول الوقت شغالة فى الترام جوه وبره يعني اللي ماشي في الشارع سامع صوت الموسيقى، وكمان في واي فاي والباسورد مكتوب على الشاشة، وعجبتنى فكرة ان يبقى في شاشتين صغيرين بيتعرض عليهم اسم المحطة اللى جاية، ولما الترام بيوصل المحطة الباب بيتفتح بعد أقل من دقيقة عشان يعطى فرصة للناس انها تنزل بشكل آمن، وقبل ما يمشى من المحطة في رسالة صوتية بتقول الأبواب ستغلق، كمان كابينة السواق شيك وحلوة ومعلقة بباب ألوميتال وفي مساعد موجود مع السواق».
وأكدت «حبيبة مصطفى»، إن تكلفة تذكرة الترام المكيف مناسبة مع الخدمة المقدمة، ومقارنة بـ الترام كافيه الذي تتساوى سعر تذكرته مع الترام المكيف، رغم كونه غير مكيف ولا يتمتع بالعديد من الخدمات، قائلة: «ممكن نعتبر الترام المكيف وسيلة مواصلات سياحية أكتر، بس فى الاخر كل واحد هيركب الترام اللي في استطاعته».
وتابعت قائلة: «من ساعة ما ركبت الترام وانا حاسة الناس عايزة تشوفها نظيفة دائما وتحافظ عليها، ومش عايزين نشوف تاني قلوب وسهمين على الكرسي».
وقال «صلاح عبدالمغني»، إن الترام المكيف أضاف لمسة جمال إلى شوارع الإسكندرية، مشيدًا بالراحة والأمان والتكنولوجيا التى تتمتع بها الترام، متابعا: «تجربة ناجحة مع انها متأخرة شوية وكنا مستنينها من زمان، حقيقى حاجة تشرف إسكندرية ونتمنى الترام كلها تتغير وتبقى كده».
وأشادت «ياسمين صلاح»، بمستوى الخدمة المقدمة في الترام المكيف، مؤكدة أنها ستعكس صورة حضارية مشرفة ولائقة بالإسكندرية، مضيفة: «بتمنى الناس تحافظ علي الترام، وبلاش قصص الحب اللي بتتكتب على الجدران وبلاش نخوره في الكراسي وبلاش الأدعية اللي برضه بتتكتب، دي حاجتنا ولازم نحافظ عليها.. رجاء خلوا شكلنا حلو قدام الناس».
الترام المكيف
الكلمات المفتاحية
موضوعات متعلقة
أخبار تهمك
