كشفت الفنانة دلال عبد العزيز في سهرانين ، البرنامج الذي يقدمه الفنان أمير كرارة في فضائية ON E سر السبحة التي تحملها دائما في يدها .

دلال عبد العزيز في سهرانين: بتفائل بالسبحة جدًا
وقالت دلال عبد العزيز في سهرانين : " بتفائل بالسبحة جدًا وعمري ما نسيتها الحمد لله، ولو نسيتها بحس إن هيجرالي حاجة دايمًا السبحة الحمرة معايا وكان في واحدة بس اتقطعت جبت دي بديلة واحدة قعدت معايا 25 سنة وموجودة لغايه دلوقت لضمتها تاني".


وأضافت: " مسكاها من أول بطولة ليا في الفيديو كان مسلسل اسمه لا مع يحيى الفخراني وقصة مصطفى أمين وإخراج الأستاذ يحيى العلمي والمسلسل نجح قوي كنت بمسك السبحة دايمًا وقولت لنفسي ايه اللي يحصل يعني لو انا خرجت بيها ابتديت اخدها معايا وانا في العربية في الطريق لغاية الاستوديو ابتديت اسبح وانا في الاستوديو وابتديت احس فعلًا ألا بذكر الله تطمئن القلوب حسيت بالجملة دي قوي".

وأشارت: " وأنا قولت كان ايه بيضايق الناس، وكان في طبعا تريقة وفي نقاد يكتبوا قاعدة مسكالنا السبحة قال يعني وسيبت اللي يتكلم يتكلم دي حاجة بيني وبين ربنا وانا ببقى مطمنه وأنا مسكاها، ممكن نبقى في فاصل دلوقتي أو بنسمع اغنية تلاقيني اسم جه على بالي من اسماء الله الاقيني بذكره برتاح ده يضايق الناس في ايه ومن ساعتها بقى ليا ورد وبقيت مرة في مرة ابقى لسة مخلصتش الورد والاقيني داخله على الاستوديو اروح داخلة بيها اكمل ما بين المشاهد وخلاص اتعودت عليها".

وأوضحت: " شىء جميل ميضرش حد، بعشق السبح وكل صحابي عارفين ان بحب السبح وكل حد يحب انه يبسطني يجيبلي سبحة، عندي سبح كتيرة قوي بس تلاقيني بحب الحمرة".

اقرأ أيضا: فيديو| دلال عبد العزيز وسمير غانم في سهرانين يرويان قصة حبهما