السلام عليكم أخي مارك..
- أهلًا عايز إيه؟!..
= انا عارف يسطا إنك قافش من التعليمه إللي المصريين علموها عليك فـ موضوع خلفيات الفيس بوك الجديدة وجو تجسس وانتهاك واختراق بس يا أخي رد السلام ده السلام لله!..
- ونعم بالله يا سيدي.. بس انا ملحد!..
= ااااه كافر يعني!..
- اه يعني تقريبًا كده.. أقدر أساعدك فـ حاجه؟!..
= والله يا مارك يا اخويا.. اخويا فـ الإنسانية بس والانشطار الكوني وكده.. المهم انا وزمايلي المصريين زي ما تقول كده متخوفين من قدرتك على اختراق الاكونتات وقراءة المسدچات والكلام إللي بيدور بينا.. فـ ياريت تطمنهم يعني..
- طب تفتكر يعني ممكن أضيع وقتي وأقرا كلام المصريين إللي بيبعتوه لبعض؟!..
= مش فاهم لامؤاخذة ممكن توضح..
- يعني بعقلك كده انا هبقى مهتم أعرف انت وصحابك بتتكلمه فـ إيه.. أو كلامك عن البنات إللي فـ دفعتك.. أو مثلًا البنت إللي انت بتحبها بس هي مسقعالك وبتعمل سين ومابتردش عليك وحطاك فـ الفريند زون؟!..
= مش عارف بس يمكن ليه لأ؟!..
- انت متخيل يعني إيه إخترق محادثة لاتنين مصريين مخطوبين.. يعني أول المحادثة يفضل يسألها مالك تقوله مفيش.. فـ أسيبهم وأروح أشرب الجعة أرجع بعد ساعه أكمل مراقبتهم ألاقيه لسه بيسألها وهي تقوله صدقني مفيش.. وبعد كدة يتصالحوا عادي فـ تحكيلوا تفاصيل يومها الممل كله وخناقتها مع ريهام صاحبتها إللي شغبطط فـ الكشكول بتاعها.. وأمها إللي قالتلها خلي عندك دم وقومي ساعدي معايا واغسلي المواعين.. يظهر إني مخلفتش بنات ولاعرفت أربي.. واخوها السائل إللي شرب البيبسي بتاعها وإزاي الوحش إتغير ومبقاش يبعتلها مورنينج تيكست!!.. تخيل مديحه صندل عايزة مورنينج تكست!..
= بس انت يا مارك كـ..
- أستنى اما أخلص.. انت متخيل إني ممكن يجي فـ بالي أدخل أشوف الشات بينك وبين أمك وهى بتقولك تعالى غيرلي صورة الغلاف بتاعة حسابي الشخصي.. يعنى انا طلعان عيني بقالى سنين عمال بطور فـ الفيس بوك عشان فـ الأخر تقولوا غلاف.. وحساب شخصي؟!..
= أمال إيه الـ..
- أمال إيه بس وزفت إيه.. تفتكر ممكن أتنازل وأشوف واحدة منزله صورة وبتقول أكتب كومنت فيه رقم 3 وهتظهرلك قطه.. والاقي البوست عليه 500 ألف لايك ومليون كومنت وبرضه مابتظهرش القطه؟!.. ومليون متخلف فـ بلدك إقتنع وصدق إنه هتظهرله قطة؟!.. ولو فعلًا كلامها صح إيه التفاهه دي هتعمل ايه بالقطه لو ظهرهتلك يا معتوه منك له؟!..
= بس الفكرة إنه..
- أسكت بقى بلا فكرة بلا نيلة.. عارف يعني إية فـ مجموعة من الناس عايزة تعرف مين زار بروفايلها بقالها 17 سنة من ساعة ما عرفوا الفيس بوك وبرضه مش قادرين يقتنعوا إن مفيش الكلام ده ولو فيه هيبقى حد أتفه منهم..
= وليه يا مارك الغلط طااه..
- طاااه.. روح يا بني طمنهم وعرفهم إن فيه حاجات تانية أهم فـ يومي ممكن أعملها.. أهم من إني أشوف واتابع هما بيقولوا إيه لبعض.. وياريت يعنى تقولهم كفايه بقى مُحن ونحنحه وشغف ودين الحب وقرف على دماغك ودمغهم لحسن عليه الحرام من لا ديني أقفلكم الفيس بوك فـ البلد كلها..
= لا دينك إزاي يعني معلش؟!..
- ما انا مُلحد يبني قولتلك انت غبي!..
=اهاا لامؤخذة يا مارك نسيت.. عـ العموم ألف شكر.. استهدي بالله كده بس وروق مالك..