قالت "مصطفى" عبر حسابها الشخصي بموقع التواصل الاجتماعي "فيسبوك": "فصلت فستان بسيط كلفني 7 آلاف جنيه على قد إمكانياتي لحضور مهرجان السينما 44 عشان أفرح وسط زملائي، لكن الأستاذ حسين فهمي لم يرسل لي دعوة وأول مره يحصل معايا كده، ليه يا حسين".

أضافت: "على فكره انا مش زعلانة وبضحك من الموقف، مش فارقه معايا، لأن لو حسبناها فالمهرجانات الجاية كتير ماهو مهرجان القاهرة للدراما كان عالمي ومهرجان الجونة برضه عالمي، وبناقص دوره ماحضرهاش في مهرجان السينما هيجري ايه يعني، والجاي أحلي أن شاء الله".

كما أدلت "مصطفى" بتصريحات لإحدى المواقع معلقة: "والله أنا شفت إنهم داعيين ناس لا تمت بصلة نهائي للفن، اللي جايب قريبه واللي جايب المهندس، واللي جايب الدكتور بتاعه اللي بيعالجه، واللي جايب جاره، لكن الفنانين إحنا ناس أعضاء نقابة، وبعدين أنا جميع المهرجانات بروحها، اللي حصل ده إن محدش بعتلي دعوة، فمش فاهمه ليه؟".

اختتمت: "وبعدين هزعل ليه يعني، الفستان موجود والمهرجانات على قفا مين يشيل، أنا عملت الفستان اللي قبله بتاع مهرجان الدراما مكلفني بتاع 16 ألف جنيه، و7 آلاف اللي عملت بيهم الفستان الجديد عشان المهرجان، قولت يلا دول ولا حاجة".