حل النجم محمد رمضان ضيفًا على برنامج صاحبة السعادة مع الفنانة والإعلامية إسعاد يونس، وذلك عبر قناة DMC، وتحدث عن بدايته مع الغناء وعلاقته بالفنان الراحل عمر الشريف.

تحدث النجم محمد رمضان عن بدايته مع الغناء، قائلاً: "بشوف إن الأسرع في الانتشار في الوصول للعالم، المزيكا والغناء مش التمثيل، وأغنياتى أنا شايفها مخلوق جديد مالهوش مسمى، لأنه لا مهرجان ولا راب ولا تراب ويمكن بعد 50 سنة يكون نوع الأغانى ده باسمى ويبقى اسمه رمضان، وهو نوع مش موجود ولا يتم تقديمه، ومفيش حاجة تشبهه".

وتابع محمد رمضان: "في البداية لما عملت إعلان كان فيه أغنية، الأغنية تخطت حدود الإعلان وبقت تشتغل في الأفراح والشواطئ، وأبقى شخص مش ذكى لو شفت حاجة عجبت الجمهور وما أكملش تقديمها وأطورها، فعملت أغنية نمبر وان وكانت ريسك لأنى لو ما نجحتش يبقى هخسر الممثل والمغنى، من البداية قررت أختار نوع مزيكا يتلائم مع طبقة صوتي وكلام يناسبني، ولقيت أقرب نوع كان برازيلى وسمعته لعادل حقي وقال لي تحفة مع صوتك، واختارت أغني للذات والنفس وبعد كده قدمت أغانى مختلفة".

وتحدث محمد رمضان عن علاقته بالفنان الراحل عمر الشريف قائلاً: "أنا مثلت مع عمر الشريف في 2007 قبل ما يعمل فيلم حسن مرقص بسنتين، وهو راجل عظيم وكان أبويا الروحي، وفى المرحلة دى كان بمثابة طوق نجاة اتحدف ليا وأنا بغرق في بحر اليأس، ومكنتش بشتغل ومفيش دلالة بتقول إنى ممكن أكمل وأنجح، وطلع النجم العالمي يقول أنا اخترته يكمل مسيرتي، وكلامه إداني قوة وحسسني إنى ماشى صح".

وأضاف: "مش هنسى إيناس بكر مديرة أعمال عمر الشريف لما قالت لي أنت متأكد من إنك عاوز تكمل عمرك باسم محمد رمضان وقلت لها اه، وعمر الشريف رد عليها وقتها وقال لها ده أحلى اسم لأن اسم محمد أكتر اسم موجود في مصر واسم رمضان هو اسم أحلى شهر مش هتحسي بيه إلا في مصر".