"موقف" على عربة فول" يحكي جدعنة المصريين

الجمعة 16/يونيو/2017 - 10:35 م

أحمد حمدي

"الجدعنة" وقت "الزنقة" والشهامة وقت "الحوجة" أبرز ما يميز الشعب المصري عن غيره من الشعوب الأخري، لم تقتصر تلك المواقف على الملاحم الوطنية والتاريخية، التي ضرب المصريون من خلالها مثالا للوحدة والتكاتف في أوقات الأزمات، من أجل العبور بمصر إلى بر الأمان والإستقرار.

يقول أحد الماريين وقت السحور أمام عربة فول:"تأخرت في الشارع ومكنتش هلحق السحور في البيت، فعديت اتسحر على عربية فول في الطريق وأنا بأكل لاحظت 4 شباب قاعدين على جمب وشكلهم على قد حالهم جدًا وجايين من سفر أعتقد، راح واحد فيهم جيه لصاحب العربية، وقاله لو سمحت يا حاج احنا على الله والله وجايين من بلد أرياف علشان ناكل عيش هنا وندور على شغل والفلوس إلى كانت معانا يدوب قضتنا مواصلات من البلد لحد هنا والله، وعايزين نتسحر بس احنا مش شاحتين وهنرجعلك الفلوس دي اللى هناكل بيها أول ماربنا يكرمنا علي طول".

لم يتردد صاحب عربة الفول الكائنة بإحدى المناطق الحيوية بالقاهرة من مساعدة الناس فى شهر الخير: فأمر أحد العاملين معه على العربة بمسح الترابيزة وتجهزيها فورًا ووضع عليها كل ما لذ وطاب من الخيرات والمأكولات".

يكمل المار قائلًا:"وبعد ماخلصوا اداهم فلوس وخدوها بالعافيه بصراحة، وأول مامشيوا قولتله الله يباركلك ويزيدك، رد عليا قالي يا استاذ والله الحمد لله ربنا بيكرمني وبيردلي إلى بعمله دا أضعاف انا مش أول مره اعمل كدا، والحمد الله ربك بيعوض علي طول انا بعمل كدا لوجه الله ومش محتاج مقابل بس والله ربنا بيكرمني".

فتفاجأ الناس بواحد نزل من عربية ملاكي وقاله لوسمحت أنا عايز منك خدمة وفي نفس الوقت أمانة ياعم الحاج، قاله اتفضل يا بيه، قالوا دا مبلغ مش هقولك كام ابقا شوفهم لما أمشي، بس عايز منك اي حد تحسه محتاج يتسحر اي حد ماشي علي باب الله ومش معاه فلوس تديله".

فما كان من صاحب عربة الفول إلا أن يردد:"شوفت ياأستاذ اني مش انا اللي بطعم وبأكل حد، ربك وربي ورب الناس هو الي بيطعمهم وأتاكد انك لما تعمل حاجه لوجه الله ونيتك مُخلصة ومش مستني مقابل هيتردلك أضعاف بس قول يارب"