وقالت "البحيري" عبر حسابها الشخصي بموقع تبادل الصور والفيديوهات الشهير "إنستجرام"، معلقة على الصورة :" الصورة دي عجبتني أوي أوي أوي أوي، مضيفة: فعلا أستاذ سمير_غانم الكل بيحبه بشكل رهيب، محدش اختلف عليه. 

وتابعت "البحيرى" فى ذات التدوينة المطولة بقولها عن الفنان سمير غانم: بيضحكني بشكل مش طبيعي، أكتر واحد في جيله ملهوش علاقه بأي إشاعات ولا خلافات ولا مصالح، الراجل ده عايش علشان يتبسط ويستمتع ويضحَّك اللي حواليه وبس، مشالش هم الدنيا فـ الدنيا مشيلتهوش هموم، لما حد بيساله في برنامج عن رأيه في حاجه أو حد. عمره ما بيقول رأيه علشان مبيحبش يزعل حد منه.

وأضافت "البحيرى" فى تغريدة حبها لـ سمير غانم: مبيقولش إلا كلام كويس عن كل الناس، علشان هو فعلا بيحب كل الناس، مبينقدش زملائه ولا بيسخر منهم. بيدي لكل الناس قيمتهم وبيرحب بأي حد سواء صغير أو كبير، وعن تجربه شخصية هو واحد من أكتر الناس المتواضعه في الدنيا، ومحب للناس فعلا، ومحب للحياة، نزلت خرجت معاه وروحنا السينما عادي جدا سنة ٢٠٠٦.

واختتمت "البحيرى" تغريدتها قائله: كذا مره كان بيخرج معايا أنا وايمي بمنتهى التواضع، بيسلم ويتكلم مع أي حد في الشارع ويرغي ويفتح مواضيع ويرمي افيهات ما شوفتها بالشكل ده، طول الوقت، كل اللي حواليه بيحبوه، وأكبر دليل علي كلامي، ضحكه #الاستاذ #عادل_امام في الصوره دي.