سيادة الرئيس حضرتك مستلم البلد الدولار 7جنيه والدهب 290.. النهارده الدولار بـ 12جنيه والدهب 440 جنيه، سيادتك أخدت مساعدات من كل الدول أكثر من مبارك في 30 سنة حكم.. للأسف أحب أقولك إن الانطباع العام اللي عند الناس كلها، إن الاقتصاد بينهار وإن كل حاجه بتغلى ومش ملاحقين، وبدات نبرة أيام مبارك ما كانش فيه الغلى ده تكتر.

لسه فيه فساد.. لسه القانون مش بيتطبق.. لسه عربيات النقل بتمشي جنبنا، و بالمناسبة كان في احصائية إن استخدام العربية النقل الواحدة للطريق بيعادل استخدام 10 آلاف عربية أخرى!!! ده غير إنها بتاكل الناس علي الطريق.

لسه في بيروقراطية.. لسه مفيش رؤيا ودماغ العواجيز (مع احترامى ليهم) بتقرر مصيرنا في وقت فيه دول حوالينا الشباب فيها بيصنعوا القرار.

كل حاجه غليت وزادت ومرتباتنا مش بتزيد بنفس النسب.. يعني مش ملاحقين الأكل و الشرب.. المطاعم حتى السندوتشات التيك أواى غليت، لا حنتكلم عن مدارس ولا لبس ولا عربيات ولا بيوت عشان خلاص الموضوع فلت، ده حتي السفر عاوزينا نتذل و نشحت لما نسافر بفلوسنا!!.. ولما بنروح المرور ولا عشان نجدد بطاقه او اي مصلحه حكومية، طبعا الوضع أنيل من الأول سواء من الروتين أو الرشاوى.

ما عندناش شك في وطنيتك ولا انك عاوز البلد تكون أحسن حاجة، بس ده مش هينفع طول ما احنا ماشيين بنفس الطريقة.. الدول العربية اللي علمناهم يقرأوا و يكتبوا بقوا أحسن مننا في التعليم، واحنا عندنا وزير تعليم بيغلط في الإملاء والامتحانات بتتسرب ولسه موجود في مكانه (ما اتكلمناش عن تطوير المناهج عشان ده حلم).

كل اللي موجودين بيجربوا فينا وما عندهمش خبرة ولا عندهم اسس يمشوا عليها، مرة نرفع حد الدولار مره ننزله!!!.

عارفين إن احنا بنتحارب وفي ضغط علينا عشان نقع، بس ما ينفعش إن احنا نكون سبب في ده بسبب قرارات مش مدروسة، زي قرار إلغاء استيراد السيارات من غير بلد المنشأ، لأن ببساطه التوكيلات هترجع تحتكر وهيغلوا تاني بعد ما كان التجار بينافسوهم ويستوردوا عربيات بمواصفات احسن وسعر أقل فكان التوكيل بيضطر ينزل الأسعار.. طبعًا القرار ده أجبر التجار يغلوا الأسعار عشان الخسائر اللي جايه.

لما الجمارك تطلب شهادة بسداد كامل السلعة من البلد اللي جاية منها السلعة.. ده في مصلحة مين؟؟.. وليه تحرمني من التسهيلات اللي كنت باخدها و ما أدفعش ثمن السلعة مره واحده؟؟؟.

مشكلتنا في الدولار عشان مفيش سياحة.. على عيني قناة السويس ما بتجيبش فلوس عشان التجارة العالمية قلت.. علي عيني.. بس ما ننساش رأي الناس اللي قالوا إن القناه الجديده مش هتعمل حاجة وهتسحب فلوس على الفاضي، ده غير إنها طلعت معمولة في المقام الأول عشان رفع المعنويات!!!.

ما بننتجش ومفيش استثمار.. و بنعمل كل حاجه تطفش المستثمر.. الدول العربية سبقتنا عشان جابوا الناس الصح في مكانها، واحنا مصممين إن لسه بني آدم يقف على الاشارة يقول مين يعدي الأول.