كشف الفنان محمود حميدة عن كواليس فيلم شمس الزناتي الذي قدمه مع الزعيم عادل إمام وذلك في برنامج صاحبة السعادة الذي تقدمه الفنانة إسعاد يونس على فضائية dmc.

وقال محمود حميدة عن تفاصيل كواليس فيلم شمس الزناتي :« طبعًا في أول مشواري يعني وكنت عملت تسع او عشر أفلام، وأصحابي عملوا شركة اسمها بوب أرت وعادل مضى ليهم اول فيلم وهو شمس الزناتي وكان مصطفى متولي وسمير فرج وسمير سيف وعادل الميهي، قالي تعالى ألعب شخصية كدة دور شرف قولتلهم لا انا مبعملش ضيف شرف».

وأضاف محمود حميدة عن شمس الزناتي : « قالي بس الشخصية صغيرة وانت المفروض تعمل حاجة تانية، قولتلهم لا انا موافق كدة ميبقاش مكتوب ضيف شرف لا اكون من ضمن فريق العمل، و دي كانت بالنسبة لهم مفاجأة ولكن أنا من البداية معنديش مشكلة أعمل دور صغير في فيلم مش موجودة عندي المشكلة دي أيًا كان مين البطل مش لازم دوري يبقى قده ممكن اعمل معاها مشهدين او كاراكتر صغير».

وتحدث الفنان محمود حميدة عن كواليس فيلم شمس الزناتي وأماكن التصوير وقال :« صورناه في البدرشين وكانت الناس فاكرة اننا عملناه في الصحراء الغربية لأن بروحها كتير والناس تسألني واقولهم لا مصورناش هنا خالص» .

وعن ذهابه الدائم للصحراء الغربية قال« بروح الصحراء الغربية في سيوة بحبها ومن الأماكن المفضلة ليا وعندي بيت هناك وبنتي أية عايشة هناك هي وجوزها.

وقال عن أوقات تصوير فيلم شمس الزناتي: « احنا صورنا في الصيف وقالوا كذا مرة هنبتدي الفيلم ومبتدوش واتعودت على كدة، لأن قبل ما ابدأ عندي واجب لازم أعمله احضر الشخصية والرسم اللي رسمته علشان ميبقاش عني ولما اشتغل أكون جاهز وأخد نفس كذا مرة على اللعب وهما يلغوا التصوير والمرة اللي روحنا صورناه فيها مخدتش نفس روحت وانا سايب ايدي اصلًا .

وأوضح عن أوقات التصوير قائلًا: « والتصوير كان يوم ثلاثاء وقولت اكيد هيأجلوا للسبت وفاكر أول شوت وداخل وانا بالحصان مع العصابة وبنزل من على العصان وسمير سيف قال Excellent وقولتله ايه يا استاذ انا مستاهلش أجرة على التمثيل دة، وعادل إمام ضحك جدًا على الجملة لأن اللي نزل من على الحصان دة مش برعي دة محمود حميدة وكمان مكنش راكب حصان ».

اقرأ أيضًا: إسعاد يونس تستضيف محمود حميدة في «صاحبة السعادة»