وتحدث زياد لـ«بوابة المواطن»، قائلًا: «أنا اسمي زياد طارق والشهرة زياد رحال، بدأت في مجال تدريب الكلاب كان بعد معاناة من قصة كبيرة ليها علاقة بمرضي وكنت بتعالج في 57357 وكان الكانسر جايلي في الغدد اللمفاوية وكان مرحلة تالتة وكانت الدكاترة مبلغة والدي أن أنا هتوفى والحمد لله بعد معاناة كبيرة من المرض والدكاترة ربنا كرم وصحتي بقت أحسن».

وأضاف: «والدي كان من الشخصيات الصعبة جدًا وكان قافل عليا ولكن الموضوع بدأ معايا من الصفر من وأنا في ثانوية عامة وحصل خلافات مابيني ومابين والدي وبدأت السيشنات بتاعتي وكانت أول سيشن بـ 15 ج وبعد كده ابتديت اتنقل من عميل لعميل وكان عندي خبرة شوية في حاجة اسمها network markting لأني كنت اشتغلت فيها فترة قبل علطول ماأبدأ في موضوع تدريب الكلاب». 

وتابع زياد طارق: «وكان بادئ معايا حبي لتدريب الكلاب من وأنا صغير وحبي للحيوانات بشكل عام لكن كنت بخاف منها وده خلاني أصر أن أنا  أبقى مدرب وابتدي أكون فاهم الكلاب دي بتعمل ايه أو فاهم اللغة بتاعتها عشان مبقاش خايف واستغليت فكرة الـ network markting في طريقة تسويقي للشغل أن أنا أعرف أوقف الناس اللي ماشية في الشارع بالكلاب عشان أفتح مجال  للكلام معاهم واعرفهم ان أنا مدرب بالكارنيه اللي معايا».