هقول قصتي بالتفصيل على أمل انها توصل لشيخ الأزهر في أسرع وقت ممكن ولو أقدر أقابل فضيلته في القاهرة لإن مشوار الأقصر طويل جدا وشاق جدا جدا عليا بالنسبة للظروف الصحية الصعبة اللي لازلت بعاني منها
أبدأ على بركة الله :
اسمي محمد محمود إبراهيم محمد ولقب العائلة (البيومي)
مواليد 30 / 05 /2001
من قرية أبوعيد مركز ديرب نجم محافظة الشرقية
أنا طالب أزهري بدرس في الأزهر من أولى ابتدائي لحد دلوقتي وكنت بفضل الله طالب شاطر ومتفوق جدا جدا في الدراسة لدرجة اني كنت بطلع الأول كل سنة
ومكنتش متفوق في الدراسة بس
كنت متفوق في ممارسة الرياضة زي السباحة وكمال الأجسام وكنت حريف في البينج بونج ومهاري جدا جدا في كرة القدم وكل ده كان بالفطرة
وفي تالتة اعدادي موسم 2016 كنت جايب بالظبط 99% وطالع الأول على محافظة الشرقية وكنت من أوائل الجمهورية
بس بعدها علطول زي ما أكون تعرضت للحسد
جيت في أولى ثانوي ولسة في الترم الاول بالظبط في تاريخ 6 نوفمبر 2016 وانا طالع من الدرس ورايح درس تاني في مدينة ديرب نجم وانا ماشي انا واتنين زملاتي وانا اللي كنت ماشي في النُّص
موتوسيكل جاي بسرعة جنونية خبطنا كلنا بس الخبطة الرئيسية كانت فيا أنا
كانت خبطة جامدة جدا في دماغي
جالي في لحظتها نزيف داخلي في المخ
عملت عملية مخ مفتوح وقعدت بعدها شهر كامل متواصل في المستشفى في غيبوبة بدون أي استفاقة أو أي حركة إلا بعد شهر
بعد شهر فوقت من الغيبوبة بس وانا بعاني ضعف حاد جدا في الذاكرة والذكاء والتركيز خاصةً في الدراسة
فمستوايا الدراسي انهار بشكل كبير لدرجة اني في تالتة ثانوي كنت جايب بالظبط 54% وطالع الأخير على زملاتي
كنت قبل الحادثة شاطر جدا في كل المواد الدراسية وخاصةً في الفيزيا والرياضيات فكان حلم حياتي اني أدخل هندسة وبالتحديد قسم مدني لاني كنت بحب القياسات والاثباتات وكان من السهل جدا اني أدخلها
بس لما حصلت الحادثة مستوى ذكائي في كل المواد الدراسية نِزل خالص خاصةً في الفيزيا والرياضيات وسبحان الله زاد في مادة واحدة بس وهي الانجليزي من عند ربنا كدة
فدعيت ربنا ليل نهار وفي كل سجدة إني أدخل تربية انجليزي
والمعجزة ان تربية انتظام سنتها أخدت من حد أدنى 50% بس
دخلت كلية تربية واتخصصت قسم إنجليزي شعبة عامة جامعة الأزهر بتفهنا الأشراف
والمفروض أكون اتخرجت سنة 2022
بس لسة في تالتة السنادي للأسف
اتأخرت تلات سنين في الدراسة بسبب ان استيعابي وتحصيلي في الدراسة بقى ضعيف جدا جدا
يعني لسالي سنتين واتخرج وربنا يسهل ويبقو هما سنتين بس مش أكتر من كدة
وكمان وانا في الغيبوبة وبسبب خطأ دكاترة أثر بشكل كبير جدا على أحبالي الصوتية
الدكاترة ركبولي خراطيم تنفس صناعي داخلة من بوقي وواصلة لحد زوري من جوة
والصحيح ان الدكاترة كان المفروض يركبولي الخراطيم من بَرَّة يفتحوا فتحة في رقبتي ويركبوا الخراطيم
بس كان في اعتقادهم ان أنا كلها أيام معدودة أو أقل وأموت فمعملوش كدة توفيراً للجهد والوقت
فلما سابو الخراطيم داخلة من بوقِّي شهر كامل، زوري لَحَم ع الخراطيم فاتكونت لحمية ع الأحبال الصوتية فبقيت مبقدرش أتكلم نهائيا كنت تقريبا شبه أخرس وكان مجرى التنفس ضيق جدا فكنت بتنفس بصعوبة كبيرة
فعملت عمليتين توسيع حنجري بالليزر بس مجابوش نتيجة كاملة فعملت عملية شق حنجري (استئصال أحبال صوتية) الدكتور قص الجزء اللي فيه ضيق ووصَّل الطرفين ببعض
بس صوتي لسة ضعيف
فالدكتور كشف عليا بالمنظار الحنجري لقى الحبل الصوتي اليمين فيه ضعف من أثر العملية الأخيرة اللي هي الشق الحنجري
فقالي هنعوز نعملك عملية حَقْن حبل صوتي
فتشاور مع دكاترة زملاته ومساعدينه في قسم الأنف والأذن والحنجرة فتوصلوا ان هما لو عملولي عملية الحَقْن، مادة الحَقْن هتقفل مجرى التنفس ومش هعرف أتنفس واموت
فاقترح ان أنا أعمل تخاطب
فعملت عشر جلسات تخاطب عن كيفية التنفس ونُطْق الحروف الهوائية والحروف الاهتزازية
بس صوتي لسة ضعيف
فقالي دا آخرنا معاك لحد كدة وصوتك هيفضل كدة😢
وكمان بسبب الحادثة حصللي ضمور جزئي تحكُّمي في أعصاب جنبي اليمين كاملا من الكتف للقدم
بس بعد جلسات العلاج الطبيعي وجلسات الكهربة الضمور بقى في أنامل إيدي اليمين
وحالياً أكتر حاجة بعاني منها بسبب الحادثة لحد دلوقتي
نفسياً
بسبب الحادثة وبسبب ان فيه بعض الأشخاص اللي كنت بعتبرهم أصدقائي وأكتر من أخواتي بقو بيتنمروا عليا وعلى ظروفي الصحية ويقولولي خلاص راحت عليك ويتجنبوني وفيه اللي بقى بيطردني من بيته بعد ما كانو بيتمنوا انهم يمشوا معايا أو حتى اني أكلمهم فقط
بسبب الحالة النفسية اللي بعانيها دي روحت لأكتر من 5 دكاترة نفسيين وروحت مركز تأهيل نفسي وعملولي هناك اختبارات ذكاء كنت بحلها كلها صح وبسرعة وحتى اني دخلت مصحَّة نفسية قعدت فيها شهرين وبرضو مفيش أي تحسُّن في النفسية
لدرجة اني انا وصلت اني بقيت بفكر اني أموت نفسي عشان أرتاح من كل ده 😢😢
وشكراً
26/12/2024
أخبار جامعة الأزهر
الأزهر الشريف
#الأزهر_الشريف
#الدكتور_أحمد_الطيب
#شيخ_الأزهر