قصائد وأغنيات في حب العندليب
الثلاثاء 28/مارس/2017 - 09:54 م
نورجيهان صلاح
طباعة
كتبت الشاعرة "سعاد على الهواري"، قصيدة تحت عنوان "حليم"، في ذكري رحيل العندليب الأسمر، وتقول القصيدة:
يا عندليب يا أسمر أنا بهواك
على قد الشوق بيعجبني غناك
أيامنا الحلوة حلوة قياما عشناها معاك
وكل كلمة حب لناها وياك
أيام وليالي مرت بحبك وقلبي معاك
مهما تغيب عنا أزاي نقدر ننساك
على موعد غرام دايمًا بنستناك
عايش بفنك ويانا خسارة خسارناك
من أول دقيقة نقول الحقيقة حبيناك
وأول مرة تحب يا قلبي واتهنى معاك
وحبيبي الغالي بكتبلك بشتاق لعنيك
والحب بيسأل ويسلم ويسألني عليك
وحياة قلبي وأفراحه دايب فيك
وبيني وبينك دايمًا بنحن إليك
وبأمر الحب طال شوقنا إليك
ونعم يا حبيبي نعم بنردد أغانيك
وبنحلم بيك ويانا والنغم حواليك
وبعد رحيل العندليب عبد الحليم حافظ إلى الدار الاخرة كتب الشاعر الكبير مجدى نجيب:
نبتدى منين الحكاية ؟
نبتديها من البداية
الألم زى الضباب
يرمى العذاب قدامك
والألم دايمًا ماغاب
دايمًا فى احلامك
فى ايامك فى انغامك
ويفرد جناحه كل ليلة
فوق كتاف اصحابك
عندليب ومين قدك؟
هفهف على خدك
شراع اخضر بمركب حب
تايه فى السنين
عندليب ومين قدى ياسعدى
مطرح خطاوى الألم
يطرح غنا وردى
ودمعة كما الموجة
اللى بتغنى على الناى الحزين
قوللى حاجة اى حاجة
فى البحر برمى كل ليلة دموعى
ترجع لى فى ضلوعى
( موعود ) بالحياة دايما تدوس ليه
فى ليل الفرحة كل شموعى
قوللى حاجة اى حاجة ؟
الرد كان اصعب من الصمت
كان نايم ممدد على كتاف الجرايد
كان خبر مرسوم
وكان الحرف متوتر وشارد
راحت الدمعة تدورعن صحاب ليها
تاهت فى لياليها
واتحزمت احزان صبية
واترنحت وردة فى ايديها
واتوجعت اهه
ورفرفت اهه
فوق سحابة ذكرى فى عنيها
نبتدى منين الحكاية
نبتديها من النهاية ؟
كامل الأوصاف
وكان موصوفلك
جبال م الصبر
زى الهوا
وكان مكتوبلك الآم الهجر
موعود
لكن بالالم وحده.. وده بالامر
وتقوللى: اى دمعة حزن لا
اقولك: فى يوم فى شهر فى سنة
لما اسمعك ياعندليب يااسمر
اقول: الله
لكن دايما فى اعماقى
كانت بتجرحنى كتير الآه
ولما اسمعك زمان ودلوقتى
احس بالقلب الاخضر
دبيح على كفى
ادوب فى الحب
واتنسم جراح بختى وبختك
سوى احنا البشر مولودين
متعذبين بالنغم
متعودين ع الالم
ولكل شىء فى الحياة بنحبه
ننزف بالجراح.. ونقول نعم
وقال السيد عودة الاطرش:
فجر الربيع ابتسم
والزهر ليه نوح
والغصن الاخضر دبل
ولاعادش يتطوح
وكل عاشق بيمسك
وردة ويلوح
سألت اهل الهوى..
ليه البكا والنوح ؟
ردوا البلابل وقالوا:
العندليب روح.
وقال ايضا:
مسكين يافن الطرب
اخر نجومك غاب
ولاعادش يمشى فى سماك
الا بريق كداب
بعد التلاته اللى كانوا
اخلص الناس
الكوكب اللى اتحجب
والبلبل اللى راح
والعندليب اللى فاتنا
وهو لسه شباب
كان الميعاد فى الربيع
والكل كان على نار
متشوقين للنغم
والفن ليل ونهار
ونسيوا ان الزمن
معاه اسرار
وقالوا: بكره حانسمع اعذب الالحان
وقبل مااللحن يكمل
دابت الاوتار
وقال ايضا:
كانت ليالى الربيع
تحلا بتغريده
ويوم مايسعد قلوبنا
يبقى يوم عيده
وكان بيضحك لنا
ويداوى تنهيده
والجرح كان يؤلمه
واحنا نقول.. الله
وهو يبكى ويمسح دمعته بايده
سافر يداوى الجراح
قبل الربيع مايهل
علشان يعود فى الربيع
يسعد قلوب الكل
ويدى للفن روحه ومهجته مايكل
لكن يعود م السفر
يبدأ سفر اطول
وكل زاده وزواده
عقود من الفل
وقال ايضا:
ياعندليب الطرب
صوتك الحلو
غايب عن ليالينا
ولاعادش غير الصدى
يسرى يبكينا
واحترنا نبكى عليك
والا على روحنا
وانعزى فيك الطرب
والا يعزينا ؟
ياعندليب الطرب
لسه المكان خالى
واسمك اللى ارتفع
لسه مازال عالى
ومين هايقدر يطوله
فى وقتنا الحالى ؟
دا المجد عايز جهود
وكفاح وتضحية
وطالب المجد يدفع له
الثمن غالى
بعدك اغانى الطرب
مااعرفشى راحت فين
والكلمة لونها انخطف
مبقتشى تملا العين
والغنوة صبحت
بتتخبط مابين شطين
وساعة تغرق
وساعة تقب من تانى
ومهما تلمع
بترجع تنطفى فى يومين؟
بكل تأكيد اصالتك
لسه موجوده
وشجرة الفن
لسه جذورها ممدوده
ولسه فاضل اساتذه
بس محدوده
وفيه مواهب كتير
عايزه اللى يرعاها
وفيه قضية
ولسه الجلسة معقودة
قصيده أخرى
أيا عندليب الروح وعبق القمر
أيا طائر الغرام الخرافي الناعس
همساتك الصافية تُغرق الحزن والأسى في بحور النسيان
وترانيمك العذبة تُسكر القلب وتهيم في حنايا الوجدان
فشدوك يا فاتني على أوتار روحي
ينقش عليها أجمل الأماني وأشجى الأنغام
سأبقى اْتاْمل أجراس روحك في تموّجاتها الأبدية
وهي تنطلق مُزدانة باللآليء...
ومُتوّجة بالورود الجورية...
اْلست لحنا خالدا لسيمفونية عشق سرمدية !
أيا حليم القلوب الراجية...
ينبثق من ثنايا وجهك نسيم رقيق كشعاع شمس دافئ
يتراءى للشعراء وكأنه فيض نهر خافق
ومن مرافئ عينيك ينساب دفق ذكرى
لهديل حب صادق تنحني على شرفاته أحلام فجر باسق
ومن تحت قبة السماء تتدفق خيوط الشمس وتلتمع لتقول لك:
يا من أسكبت في الأرواح الظامئة طعم الخلود
ويا من ترقد في أعماق أبديتي
ستبقى ذكرى خالدة في قلب الوجود.
أخبار تهمك
